الصبح شعشع واقبل النور بالنور
والليل الاسود مايجيب الصراحـه




ماني بضايق لكن القلب مقهـور
مثلي تساوت ضيقته وإنشراحـه




آمنت باللي ثبّت اطويق والطـور
عساه يلهمني ثبـوت وفصاحـه




واضح واحب اقابل الناس مسرور
مخلوق من بين الرضا والسماحه




اكتب قصيدي همي إسعاد جمهور
ماهمني فوضه وصوره وساحـه




موجٍ تلاطم من ورى سبعة ابحور
حروف شعري للمخاليـق راحـه




يامبتليني بالحكي اسمع الشـور
لا تحسبنّك عايش بوسط واحـه




اللي خلقنا ميّـز الحـق والـزور
الفرق واضح كالسمـا والبراحـه




الطب يبغاله من النـاس دكتـور
والهندسه تبغى ارتفاع ومساحـه




ياللي تقول اني من الناس مغرور
ميّز هماج المـا وميّـز قراحـه




لامن كبر راسي مع الطيش معذور
لكن غرور الشخص سبة مطاحه




نسعى بهالدنيا نبي الحال مستور
والمجتهد همـه وغمـه نجاحـه




ياصاحبي لا تقعد اتلـف واتـدور
الطير وشهو ؟ لو كسرنا جناحـه




منت بمعي يابنت الاجاويد مجبـور
من راح مني سمّـح الله مراحـه




"تحياتي"