تجربتي في الإضراب عن الطعام 40 يوماً

تجربتي في الإضراب عن الطعام 40 يوماً

بسم الله الرحمن الرحيم
هذه تجربتي في الإضراب السلمي ( الصيام ) عن الطعام لمدة 40 يوم ، سأكتب التجربة على شكل حوار بيني وبين صديقيأسئلة وأجوبة ) ولذلك لسهولة القراءة والاستمتاع
الحوار يبدأ حينما أخبرت صديقي بأني صائم عن الطعام
نص الحوار :
نعم اخوي ؟ لحظة لحظة ! صيام ؟ وأربعين يوم!
ايه ههههههه
لا تضحك !
ابشر ( يكتم الضحكة
سلماة يغلي ! خير خير يابوي ! بعدين يعني كيف ؟ اشرح لي وضعك ؟ كيف صيام ؟ ما تاكل شيء نهائياً ؟
بالضبط .. صوم عن جميع الطعام والشراب ما عدا الماء
لحظة ! طيب قهوة او شاهي ؟ أو مثلاً فواكه ؟
لا
طيب سلطة ؟ عصائر ؟
لا
كيف تعيش ؟ مستحيل ! لازم تموت !
لا مو لازم ، للمعلومية : هناك العديد من الاشخاص سجلوا أرقام قياسية في عدد الأيام اللتي عاشوها بدون طعام ووصلت في بعض الحالات الى أكثر من سنة ( تحت اشراف طبي ) وايضا بعض الاسرى والمعتقلين الى اكثر من 70 يوم بدون طعام
طيب الاسرى مجبورين على هذا الشيء لتحقيق مطالبهم ، أنت ليش تسوي هالشيء ؟
كانت عندي بعض الأهداف اللي دعتني للصيام
راحة الجسم من هضم الطعام حيث أن 80٪ من طاقة الجسم تذهب للهضم ومشاكله و يصبح العقل لا يعمل ويكرر روتينه اليومي بشكل مزعج ! كنت ابحث عن الجوع اتباعاً للنصائح ، واللتي كانت متعددة المصادر مثل الشريعة الإسلامية كـ قول الرسول ﷺ ( ما ملأ ابن آدم وعاء شراً من بطنه ) وحتى حديثاً كـقول ستيف جوبز ( ابقى جائعاً .. ابقى أحمقاً )
تخفيف الوزن ، لا أعاني من سمنة مفرطة ولكن سمنة متوسطة مزعجة لي ، لم يكن هدفي الأساسي لكن هدف متوسط الأهمية
ابغى احس واشعر باحساس مختلف تماماً وجديد ، شعور الجوع الحقيقي ، بلا طعام لأيام وليال وليس لـ ليلة واحدة ! كيف أعيش ؟ كيف أتصرف ؟
كلامك كثير يا ولد
لازم لازم .. هذه اهداف ماهي عبث
طيب شفت او سمعت تجارب سابقة للناس ؟
يروى ان عيسى عليه السلام هو أول من بدأ الصيام بهذا العدد من الأيام ، في عهدنا الحالي قام بهذه التجربة الشيخ الألباني رحمه الله () وأيضا اليوتيوب مليئ بالأشخاص يحكون عن تجاربهم .. فقط اكتب ( Water Fasting )
طيب .. كيف بديت واستعديت للتجربة ؟
بديت مع بداية الأسبوع ، والاستعداد كان على عدة جهات
وقفت إستعمال الشبكات الإجتماعية كلها ( علشان ما تأثر علي في القرارات )
نظفت الثلاجة وكان هذا منظرها

طيب كنت مدخن ؟ أو مدمن قهوة أو شاهي ؟
غير مدخن ، لكن مدمن شاهي وقهوة أمريكية
كيف بديت يومك الأول ؟
البداية عادية جداً .. التحدي الأول كان وقت الفطور في الدوام ، صداع طفيف وقرقرة معدة تقول أنا جائعة
طيب وقت الغداء والعشاء ؟
صراحة كان وقت سيء جداً جداً جداً .. خايس .. مقرف .. وصخ .. طلعت من الدوام والنوم والصداع والجوع ماكل من جسمي كثير !
لما صحيت من النوم كان وقت ( دنكن ) المعتاد لي .. طبعاً حسيت وقتها حامل وكأن بتجيني دوخة لو أحد حكى لي عن القهوة !
وقت العشاء صرت أقدَر كنتاكي ! ما عندي مشكلة آكل منه وما اشتكي ابداً ! جوع جوع ( ج و ع ) !
انتهى اليوم بالتعب والنوم
هههههههههههههههه كل هذا صار باليوم الأول؟
يب
طيب يا سيد عمر كيف تعاملت مع اليوم الثاني؟
مثل اليوم الأول ، جوع وتعب .. بس يوم صحيت العصر حسيت بطعم في فمي كريه والرائحة موجودة ، حاولت اعالجها بسالفة معطر الفم بس حسيت بطعم سكر وتوقعت ادمن على المعطر فـ الغيت الفكرة واستبدلتها بتفريش الاسنان أكثر من أربع مرات في اليوم ، ايضا تغيرت ملامح وجهي بشكل متوسط إلى خفيف ونوم الظهر صار يخف بشكل ملحوظ وصار يكفيني ساعة الى ساعة ونص والتعب لازال موجود والإرهاق كذلك
أكيد بتتعب لانك ما تآكل شيء!
لا ما كان هالشيء هو السبب ، صراحة كان بسبب ان الطاقة في جسمي محدودة وكنت اضيعها في شغله بسيطة ! مثلاً اصعد الدرج بسرعة أو امشي بشكل سريع ( هذه الأشياء كانت طبيعية ولكن مع الصيام لازم تغير طبعك وتصرفاتك علشان ما تجهد نفسك وتتعب ) ولكن بعد فترة اكتشفت كيف اوزع طاقتي المحدودة على العمل وما اتهور << حط تحتها ثلاثين خط
ليش تحتها ثلاثين خط ؟
نجي لها بعدين !
طيب سمعنا أن اليوم الثالث حافل بالأحداث .. سولف علينا وش صار ؟
كل الناس اللي جربوا الصيام كانوا يقولون اليوم الثالث هو آخر يوم في التعب الحقيقي والأرهاق .. وكنت متحمس أخلص اليوم بأي طريقة .. وقلت ليش ما أدور أخصائي تغذية يراقب تجربتي .. رحت لـ أكثر من مستشفى ومستوصف وما فيه للأسف طبيب !
ليش ؟
أتوقع انها تخصص جانبي وماهو أساسي في المستشفيات وراح يكلفهم ميزانية
طيب وش سويت ؟
لقيت أخصائي تغذية في أحد المستشفيات الكبار
وش فيك حزين ؟
طلع ( اخصائية تغذية ) ماهو ( اخصائي )
طيب ليه حزين ؟
والله يا اخوك تبي الصراحة ؟ تخرفنت معها
هههههههههههههههه اعقل ياولد !
والله اني صادق .. ياخي لسانها وسوالفها تخقق
ركز يا ولد .. وش قلت لها عن موضوعك ؟
( لحظة صمت )
ولد .. يا ولد .. هيييه !!!
هاه .. وشو ؟ احبك !
يابن الحلال قلنا وش صار معك ؟!
ايه ايه .. وش اسمه هذا .. قلت لها عن صيامي …
وش قالت ؟
تبي الصدق ؟ والله انها ما عندها ما عند جدتي .. صح مزة وموظفينها علشانها مزه واذا شافها الدب يخق وينحف ههههههه لانه سألتها عن وضعي وما عطتني معلومات مفيدة حيل .. بس قبل ما امشي قالت لي ( دير بالك ع حالك )
وش ردة فعلك ؟
طلعت على طول لمطعم الرومانسية وانا ما بين عيوني الا هي ابي أكسر الصوم لابو الصوم كله !
هههههههههههههههه سعودي وكسرته طبعاً ؟
ماهو انا اللي تخرفني دكتورة !
• ههههههه طيب وانتهى يومك الثالث ؟
للاسف بشكل فضيع ! ما نمت في الليل وصرت اتقلب وضربني جوع جوع فضيع وصداع رهيب جداً ولا نمت الا متأخر وحالتي حالة ! اتوقع نهاية يوم ثالث لازم تكون كذا !
فيه ملاحظات حتى الآن ؟
نعم .. الآلآم فضيعة في العضلات والعظام وخصوصاً بعد ما اصحى من النوم ! كأنك مسوي مجهود رياضي فضيع !
طيب راجعت طبيب أو مختص ؟
صراحة قبل ما أبدأ صيامي كنت افكر اتابع مع طبيب مختص ، لكن للاسف ما فيه احد يختص بامور زي كذا .. وزرت كذا طبيب وطالبوا بفحوصات بمبالغ ضخمة وعرفت ان الدعوى نصب في نصب وتركتهم
طيب اليوم الرابع .. فيه شيء مهم ؟
بديت اعاني من حاجات مثل روائح المطاعم كانت تسبب صداع ودخلت بقالة وحسيت بدوخة !هههههههههههههههه كل شيء ودك تاكله حتى صابونة (لوكس) احس طعمها صار يجنن
بديت تقدر النعمة وما ترفسها صح ؟
ما كنت الحمد لله جاحد للنعمة بين يديني .. لكن ما كنت مقدَر لها !
كنت ابغى بيتزا بدل خبزة للعشاء !
وابغى كبسة بدل صحن صغير للرز !
وابغى لحم بدل الدجاج !
صح أيام بسيطة لكن تغير وضعي وتقديري للنعمة زاد اكثر واكثر
طيب لك اربع ايام بدون اكل .. كيف وضعك مع الحمام ( أكرمكم الله ) ؟
ما استعملته من بداية الصيام الا للتبول ولكن اليوم الرابع افرغت ما في المعدة حسيتها لحظات وداعية للحمام وان الجسم تخلص من كل الفضلات !
طيب وبعدين ؟
صار لي موقف غريب شوي ! حلمت اني اكل !
ههههههههههههههه
لا تضحك قمت من النوم فيني جوع
تستاهل .. محد ضربك على يدك
طيب
( يحوس اوراق الاسئلة )
تصدق ولا لا ؟
وشو ؟
كل اسبوع اتنقل من مدينة لمدينة ! وانا صايم وحالتي حالة !
كيف استقبلوا اهلك خبر الصيام ؟
ما علمتهم
افاااا .. ليه ؟
بيصير هواش ويجبروني بالقوة على تركه !
طيب كيف قدرت تعيش وسطهم صايم !
شوي تصريفات + كذبات
والله وضعك محيوس شوي !
نوعاً ما .. ومن جهات كويس ومنظم .. كذا الحياة
اتوقع الآن كملت اسبوع ! اسبوع كامل بدون اي اكل ؟
نعم .. فقط ماء
وش فيه شيء تغير فيك ولاحظته حتى الان ؟
جسمي ووزني نقص ، كل يوم ينقص كيلو بالضبط
عقلي يفكر في الاكل بشكل ملحوظ ومزعج ولاسباب كثيرة منها وجود في منزلي ومع طبخ امي وكذلك نوعاً ما اميل للطبخ شوي واي شيء نيء اشوفه مطبوخ وباحسن صورة
تغير في المشاعر ، حسيت نفسي مرهف نوعاً ما هههه لو تقول لي أنت شرير جلست اصيح عندك
يا شرير !
يابوي هذا أول زمان مو هالحين هههههههه
طيب طيب .. كيف وضعك مع اهلك ؟
ما توقعت الاهل ينتبهوا لك وانوا ما تاكل شيء ! حتى امي جتني بغرفتي وعطتني قبلة على راسي وقالت فيك شيء ؟ طبعاً وقتها شوي واصيح بس هديتها وقلت رجيم ويمين يسار ومشى الوضع ( عيون حزينة )
وش نوحك حزين هلون ؟
ياخوي صار لي موقف مع اهلي .. جوع !
ههههههههههه وش صار ؟
ابد .. قرروا يتعشون في مطعم صب وي !
طيب وين المشكلة ؟
ولا شيء .. اللهم انهم طلبوا مني اختار لهم العشاء والساندوتش والاضافات .. ( يصيح )
خلاص يا ابن الحلال تعال خن اخمك
( صياح )
هد .. تعوذ من بليس .. هانت ..
( بكاء مع شهقات )
خلاص لا افقع وجهك
ابشر ابشر
طيب وش صار بعدها ؟
وصلت البيت مرهق ونمت من التعب
كيف تعاملت مع الإحباط اللي يجيك من هالمواقف وطبخ امك واي وجود للاكل حولك ؟
صراحة ؟ كنت افتح اليوتيوب واشوف مقاطع للناس تاكل لاول مرة بعد صيام فترة طويلة ! كان مشهد مشجع جداً لي ومحفز
طبعاً ما راح نمشي معاك يوم يوم لكن انت احك لي وش صار بعد اسبوع ؟ كيف حياتك تغيرت ؟
صرت فاضي وقت كبير كبير ! وقررت أتجول في كتب الصوم ، للاسف محتوى الموضوع هذا ( الصوم الطبي – أو صوم الماء ) قليل جداً .. حتى اللغة الانجليزية يعتبر ضعيف جداً ..
( زرت مكتبة جرير والمحتوى اللي فيها عن الصيام يكون دائماً مرتبط بالدين وصوم رمضان وكذا .. فما استفدت منه نهائياً )
المهم حصلت كتاب اسمه ( التداوي بالصوم ) بالنت وكان قديم جداً ومترجم .. كتاب يعتبر هو المصدر الوحيد للصيام عن الطعام ، فيه أقسام كثيرة وفوائد رهيبة وراح اذكر كذا نقطة
الصيام ليس مقصر على البشر بل حتى الحيوانات تصوم ومنها الفقمة وحتى النباتات تصوم ومنها البصل !
الصوم يريح القلب من ربع نبضاته السابقة وتنخفض من 80 الى 60
النساء يخسرن بالصوم اكثر من الرجال
المرضى يخسرون بالصوم اكثر من الاصحاء
الجوع لا يعني الإشتهاء كما الجنس لا يعني الحب
كلام كويس يا صديق ، طيب سؤال سخيف وبسيط .. مضى لك اكثر من اسبوع صائم .. ما تجوع ابداً ؟
الا ! بس جوع مختلف تماما ً .. يعني اشوف صورة للاكل واشتهيها بس لو قدمتها لي ما اكلتها ! كأن المعدة شبعانه ولكن العين جائعة ! جوع كاذب
طيب ما راح امشي معاك يوم بيوم قلي انت وش الاحداث المهمة ؟
اليوم الثاني عشر انبسطت ! صحيت من النوم وبطني يوجعني من الجوع !
احد يفرح انه جوعان ؟
ايه .. حسيت جسمي طبيعي وقتها كان جسمي غير طبيعي لا من ناحية خشتي ولا من ناحية اي تصرفات تظهر منه .. كل شيئ متغير وفرحت كثير لما شفته يتصرف بشكل طبيعي
هههههههههههههههه ايوه .. كمل يا اخ
اليوم الرابع عشر
لحول .. وش فيك هالمرة ؟
جتني حساسية خلف الاذن وفي الجبهة !
هذا الصوم اعطاك كف بالجبهة هههههههههه
اي والله
اشرح لنا الوضع …
صراحة ما انتبهت الا بعد ما شافني صديقي واعطاني تنبيه .. ولما شفتها تفاجأت ! بقع حمراء صغيرة ولكن لما تتحسس المنطقة ما تحس بشي ! ولا الم ولا شيء !
يعني ما فيه بثور او انتفاخ ؟
نهائياً ! فقط بقع حمراء صغيرة !
رحت للطبيب ؟
رحت لطبيب وماعرف السبب .. ورحت لثاني وقام يسأل ولما عرف الصوم قال انه هو السبب
وصراحة لو ما قلت له ما اتوقع يكتشف الامر !
طيب كمل ..
فيه مشكلة اعاني منها وقت الصيام ، اي جهد اسويه بشكل بسيط لكن مفاجئ مثل انك تركض فجأة مترين او ثلاثة او تشيل حاجة ثقيلة كم متر تحس قلبك يرجف وكانك بتموت من شدة الجهد ! اتكلم عن تعب حقيقي ومخيف !
طيب للان وضعك سليم بشكل عام ؟
حتى اليوم السادس عشر كل شيء تمام ، فقط مشكلة الحساسية ولا فيه شيء ثاني .. لكن .. لكن .. لكن
لكن وشو ؟ وش فيك ؟
اليوم السابع عشر
وش صار ؟ تعبت ؟
لا ، صار فيه تغيرات بشكل ملحوظة وبعضها غريبة .. اول تغيير لون لساني رجع من اللون الابيض الفاتح الى اللون الطبيعي ! وكأني ماني صايم ! وهالشيء قريت عنه انه طبيعي !
طيب وش المشكلة ؟
ما فيه مشكلة حتى الان ! المشكلة صرت احس بجوع حقيقي ! وبطني صار يعطيني احساس الجوع الحقيقي ! واحساس كان اني اكلت امس واليوم ما اكلت شيء !
فيه شيء مسويه بحياتك غير طبيعي ؟ ليش الالم جاك كذا ؟
ما فيه سبب ، بعض الاقوال اللي قريتها بان الجسم يرسل إشارة على ان هذه النهاية ! ولازم تكسر الصوم والاشارة اللي يرسلها الجسم هي لون اللسان واحساس الجوع ( طبعاً انا غير مؤمن بهالشيء وكذلك اغلب اللي قريته العكس تماما وان هذه اشياء عادية تجي بين فترة وفترة من الصيام .. وكملت الصيام )
طيب وش صار بعدها ؟
جاء اليوم التاسع عشر ! يوم المصيبة
مصيبة ؟ وش سويت يا مجنون ؟
ما سويت شيء !
اشرح لنا يومك بالتفصيل ..
يومي المعتاد اروح للدوام .. اشتغل باقل جهد وطاقة .. احافظ عليها وما اجهد نفسي .. واذا طلعت من الدوام انام .. علشان اشحن جسمي بـ طاقة كافية .. واصحى المغرب واذا جاء 12 بالليل انام ! واصحى بطاقة جيدة جداً ..
طيب وش صار؟ وين المشكلة ؟
كسرت الروتين بغباء ! بدل ما انام الظهر قررت اخلص بعض المشاوير ! وكانت اموري كويسة العصر الى الساعة 5 العصر ! بديت احس بدوخة وكنت على وشك السقوط في احد المحلات ! طلعت واخذت علبة ماء باردة وشربتها .. شغلت المكيف البارد في السيارة .. استرخيت شوي .. صحصحت .. على طول سويت قياس للسكر والضغط .. كانت اموري عجيبة جداً جداً .. القياسات سليمة حتى الضغط 120/90 !!
رجعت للبيت .. قفلت النور .. نمت ! الساعة 6 المغرب وصحيت 11:30 الليل ! شفت الساعة ورجعت اكمل نوم مرة ثانية ! وصحيت بالقوة الساعة 6 الفجر ! يعني تقريباً 12 ساعة نوم !
بديت اشعر بقوة وانها مشكلة وعدت .. فعلاً اللي سويته خطأ ومفروض امشي خطوة خطوة ولا اجهد نفسي بحاجة قوية تتعبني
صحيت وغسلت واتجهت للدوام .. كان درس قاسي بالنسبة لي .. بس درس جداً ممتاز علشان في المرحلة القادمة اوزع الطاقة في جسمي صح وما اجهد نفسي بحاجة فوق طاقتي
تأدبت ؟
جداً
قل عمي الصوم !
عمي الصوم
اثر عليك تعب امس في دوام اليوم اللي بعده ؟
يب
كثير ؟
يب
وش صلحت ؟
كسرت الصوم !
هاه ؟
كسرت الصوم
ليه ؟ ليه هلون ؟ وش فيك ؟
( لحظة صمت )
( يسحب شمه هواء من خشمه )
( يعطيك فيس حزين )
وش صار عليك ؟ طحت في الدوام ؟ صح ؟
لا ابداً ..
تكلم طيب .. وش صار ؟
بدأ الدوام .. عادي جداً .. وبعد ساعة من الدوام .. بديت احس بدوخة ! وقفت اشغالي كلها .. لازالت الدوخة موجودة !
وش نوع الدوخة ؟ وش تحس فيه بالضبط ؟
كنت احس باني بفقد الوعي ! وكأن فيه حاجة بتنكسر داخلي !
طيب حاولت ترتاح ؟
يب .. وقفت الشغل .. بس لازالت موجودة
وش سويت ؟
طلعت من الدوام .. مستأذناً طبعاً للمستشفى .. على طول قياس سكر وضغط .. كل شيء طبيعي ! هنا حسيت بإحباط وقهر
ليش ؟
حسيت جسمي يقول هذه قدرتي .. كل شيء طبيعي ولكن دوخة واجهاد
كيف كسرت الصوم ؟
كسر الصيام موضوع ثاني ! شيء مجهد !
عادي وش فيها ؟ كنت صايم وافطرت !
لا يا حبيبي ..
20 يوم بدون اي لقمة !
20 يوم فقط ماء !
24 يوم بدون حمام ! جلست اربع ايام زيادة بعد كسر الصوم
وش اول شيء اكلته ؟
اكلت ؟! هههههههههه
• قلت شيء يضحك ؟
لا .. بس ذكرتني اني ما اكلت شيء الا بعد ثلاث ايام
ثلاث ايام ؟ وش كنت تسوي ؟
اول شيء دخل حلقي هو عصير برتقال طبيعي ( بدون سكر ومخفف بالماء )
كم شربت ؟
خمس رشفات !
تكفيك ؟
جداً ..
طيب وش المشاعر اللي جتك وقتها ؟
الصيام أدب نفسي بشكل جداً رائع ، أنبهرت من رائحة البرتقال ! كأني أول مرة في حياتي أشمها ! كان الطعم خرافي ، اول رشفة وكأن مخي يضربه سلك كهرباء ! جسمي أهتز !
كان العصير طبيعي وبدون سكر ولكن في فمي كأنه انفجار كوني عظيم مليان بالسكر ! حتى اتذكر انه راسي بعد ثلاث ساعات كان مصدع من كثرة السكر في العصير ! لساني كان يحلل كل قطرة من العصير فيه ! كنت بنجن !
حسيت بولادة جسمي من جديد !
مشاعر حلوة .. اكيد كنت مبسوط ؟
مستحيل احدد مشاعري ذاك الوقت ! كنت ما بين فرحة باللي اذوقه ! وحزن لكسر الصوم
كثير من الأسئلة اللي في بالي بعد التجربة اللي حصلت لك .. بطرح لك واتمنى الاجابة باختصار :
• من عرفك بالصوم ؟
~ صديق ادين له بالشكر على تغيير حياتي
• وش نوع الماء اللي تشربه ؟
هذه نقطة مهمة جداً، بحثت في هالموضوع كثير وشفت ثلاث انواع :
ماء المنزل ، لا ينصح فيه إطلاقاً
ماء مقطر ، لا ينصح فيه إطلاقاً
ماء صحي معلب ، هو الهدف
طيب اخترت اي نوع ؟
كنت اتحاشى النوع الرخيص والسيء مثل اكوافينا وهنا ،، بس انا اخترت ( اروى ) بسبب جازت لي العلبة حقتهم وقليل الصوديم كذلك
تنصح الناس بتجربة مثل هذه ؟
كل شخص يختلف عن الثاني ..
الولد يختلف عن البنت
السمين يختلف عن النحيف
المريض يختلف عن الصحيح
كل شخص وقدرته
ممكن يسبب لك امراض !
ممكن ينحفك ! ممكن يشفيك من الامراض !
ممكن يثبت وزنك وما يتغير ! وفيه حالات يزود فيها الوزن ! المسألة مسألة ( كل جسم يختلف فيها عن الاخر )
طيب طيب تنصح فيها ولا لا ؟
ايه بس حط عندك تعليمات مهمة !
وش هدفك من الصوم ؟ حقين الرجيم ما انصحكم فيه لانه مضر أكثر من ماهو مفيد لكم
متى توقف ؟ حط لنفسك خط احمر ولا تتجاوزه مثلي انا ( خطي الاحمر هو مجرد ما احس بدوخة بوقف الصوم او ظهور مرض خطير على الجسم )
لاتسوي الصوم وانت تشتغل وتداوم ! راح يكون الجهد مضاعف وممكن يسبب أشياء غير متوقعة !
لا تسوي اي مجهود رياضي ولو حتى مشي من دون غرض .. تراه بيتعبك كثير وتنهار.
مارس اليوغا كثير ، ولو ما تعرفها اجلس قبل وبعد الصلاة كثير وحاول تسترخي ( مفيد جداً لتجديد طاقة الجسد ) .
لا ترفع مستوى الطموحات ! راح تنكسر وممكن ترجع شخص سيء وبقوة بسبب انك ما حققت الطموحات اللي تتخيلها وكذا.
ترا ما فيه مجال تقرأ وتستفيد منه في هالشيء ولا فيه كتب ولا مراجع في النت ولا في المكتبات حتى ! راح تتورط وتحس نفسك بمغامرة كبيرة وعظيمة وتحتاج شجاعة قوية
تجربة حلوة .. مغامرة شيقة .. فيها مخاطر .. حلوة النهاية وان كانت بدون انتصار .. راضي عنها ؟
الحمد لله على كل حال .. راضي بشكل عام
راح تعيد التجربة مرة ثانية ؟
انا الآن صايم
كم لك يوم صايم ؟
…
الوه ؟
…
يا ولد ؟ وين رحت ؟
…
شكراً من القلب لقرائتك هذه التجربة
اطرح سؤالك في التعليقات أسفل
أو عن طريق توتير
حسابي :
iomar959
* تحديث : شاهد هذا الموضوع التعقيبي للتجربة
http://www.omar9.ws/archives/114