يامل قلب بين الاضلاع يرجف = سمعت له وسط الضماير رجيفي
جا ني خبر في الليل وافز مختف = فزة قريص الداب يقفز مخيفي
والله لو ان المقادير تصرف = بالمال والا بالسلاح الرهيفي
اني لاعرض الروح لو كان يتلف = لا بيع غالي الروح باعة معيفي
ياخويه اللي يوم الاخوان تعرف = طرياه في وسط المجالس شريفي
عساف للأصعاب ماهوب يعسف = وسيف على يمناك يصلف صليفي
واليا ظهر له عايل قال له قف = حتاه يرجع عن طريقه معيفي
وان كثرت الأشوار رايه يصرف = ولا هو بوسط المجالس خفيفي
دون القبيله واقف ما تخلف = وممثل ما بين رمح وسيفي
ما تبخصينه يالقلوب المغلف = قعدان بن فراج حيد منيفي
حرا ليا منَه تنهض وشرف = يقضي على طلعه بكف ظريفي
سعد الرفيق اللي من الظيم يلهف = بالمال والا بالكلام اللطيفي
ويمنى تنول الجود مد ومنسف = عد الروى ماهوب رسٍ غريفي
ورث لابوه وسنده يوم خلف = يوم بعض الناس ماله خليفي
ولاني عن بعض المعاني مكلف = ياكود اخويه عيد قلبي وريفي
عز الله اني بعد فرقاه باضعف = لو كان ماني في المواقف ضعيفي
هو الوليف اللي لمثلي مولف = لا وا غبوني يوم قفى وليفي
هذا ثلاث اسبوع والدمع يذرف = واليا طرى طاريه بازنف زنيفي
عسى السحاب اللي بروقه تراهف = تمطر على قبره مزون الخريفي
وعساه في الجنه يفرش ويلحف = وفي جنة الفردوس جعله يضيفي

الله يعوض عليهم
شكر لمديرنا العام على هذا الطرح
تقبل تحياتي0