منتديات ديوانـية القاريـه و لـحيفه الرئيسـيـة - عرض مشاركة واحدة

13-01-2012, 10:56 PM

جبتلكم اليوم إهداء للبنوتات

على شانكم هذي مشاركه ثانيه يا بنات الرجال المطاليق عسى تعجبكم

البنات ما فيه مثلهن

غمّض عيونك تصور بلده ما فيها بنات
الشواطي خاليات
الشوارع خاليات
المجالس خاليات
فتح عيونك و قـــُل لي مثل شنهو هالحياة
و شكثر ثم شكثر ثم شكثر لولا البنات
شكثر كانت كريهة هالحياة
البنات ما في مثلهم البنات

البنات هم البداية لولا حوّا ما صحا آدم و تملك في سُبات
ما خفق قلبه و لا تحرك شعوره و تمّت عيونه في جفون مغمّضات
من حكيهم من ضحكهم يضحك اللولو يتناثر بالمئات
من سحرهم تنسحر دنيا بكبرها
تنزل نجوم السما تمطر ورود معطرات
هم ساس الساس
وتاج الراس
وكل الناس وهم جنة الماضي و الحاضر و اللي آت
و شكثر ثم شكثر ثم شكثر لولا البنات
شكثر كانت كريهة هالحياة
البنات ما في مثلهم البنات

وانتَ طاير .. وانتَ طاير منهو يطرد عنك هموم السفر ؟
البنات
و انت قايم
و انت نايم
منهو دايم
يفتح عيونه عليك يسهر يبات
قــُل لي منهو اللي يخلــّـي قلبك الخامد يشبّ غير البنات
وانت متضايق و غرقان في الزعل
منهو يقلب عيشتك المره عسل
في الروايات و القصص
ما حلت قصة و لا طابت روايه خاليه ما فيها بنات
هم شي في كل شي
و هم حي في كل حي
لو طفت ساعة مكينة الكهربا .. هم القمر شمعة تضوي في كل بيت
فرحة القلب هم و هم من وتك قلت ياليت
الزرانيق و السكيك بهم براح
و هم زينات البساتين الملاح
البرايح قفره من دونهم خلاوي موحشات
وبيت بدونهم صحرا ظلمه تعوي فيها العاويات
و شكثر ثم شكثر ثم شكثر لولا البنات
شكثر كانت كريهة هالحياة
البنات ما في مثلهم البنات

قولـــــــــــــوا آميــــــــــــــــــن
لان دعيت الله يخليلنا البنات
الله يحفظهم
يكثرهم
يزيدهم في الحلاة
و قولوا هات لان ما كتبت فيهم قصايد قولوا هــــــــــات
و لان سكتّ انت و تحكــّى وسألوا ليش السكات؟
الكلام فيهم
هو المطلوب
هو المرغوب
هو المحبوب
وغيره خربشات
و شكثر ثم شكثر ثم شكثر لولا البنات
شكثر كانت كريهة هالحياة
البنات مافي مثلهم البنات

وشكثر
ثم شكثر
ثم شكثر
لولا البنات
شكثر كانت كريهة الحياة
البنات ما في مثلهم البنات

قصيدهللشاعرعبدالرحمنالرفيع شاعر بحريني